BUTUAN CITY – Subling gibatikos ni Vice President Sara Duterte si Pangulong Ferdinand ‘Bongbong’ Marcos Jr atol sa press conference kaganina gawas nga bahin sa St. Luke’s Hospital sa Quezon City diin na-admit si Atty. Zuelika Lopez, ang chief of staff sa Office of the Vice President kon OVP.
Sigon ni VP Sara, dili makamaong magdesisyon si Pangulong Marcos ug daw gipasagdan lang niini nga mulihok ug magdesisyon ang iyang ig-agaw nga si House Speaker Martin Romualdez kinsa duna’y dakong kagustuhan nga mahimong presidente sa nasud rason nga dili na maayo ang direksyon karon sa nasud.
Dili matud pa makontrola sa pangulo ang iyang ig-agaw tungod sa iyang zero-decision making skills rason nga nasayang lang ang oras sa nasud tungod sa kawala’y abilidad sa pangulo.
Gawas niini, daghang oras ug pundo pa ang nasayang tungod sa tinguha sa administrasyon nga iduot ug pangitaan og isyu ang ilang pamilya nga hulga sa ilang ambisyon.
Inay na muhimo matud pa unta og lakang ang gobyerno aron mumaayo ang kahimtang sa katawhang Filipino ug ang ekonomiya sa Pilipinas, nakatutok na hinuon ang kasamtangang administrasyon sa pagpahumot sa ilang pangalan sa pulitika.
Gibatikos usab niya ang House of Representatives nga padayong mi-ipit sa mga personahe sa Office of the Vice President taliwa nga wala sila’y mapamatud-ang duna sila’y gihimong anomaliya. Apil sa iyang gibatikos ang pagkwestyon sa House Committee on Good Government sa istilo sa iyang pagdumala sa OVP.
