BUTUAN CITY – Patong-patong nga mga kaso ang atubangon sa duha ka lalaking Agusanon human nakuhaan og balor 400-mil pisos nga shabu, usa ka .45 nga kalibreng pistola, mga bala, ug duha ka hand grenades dihang na-hold sa checkpoint sa ginsakpan sa Agusan del Norte Provincial Mobile Force Company.
Natigayon kini niadtong Sabado sa alas-singko sa hapon sa mas gipakusgan nilang checkpoint sa District-6, Barangay Camagong, lungsod sa Nasipit, Agusan del Norte. Ang maong mga butang, nakuha human gipara sa maong mobile force company ang usa ka kolor maroon nga Toyota Vios nga miresulta sa pagkadiskubre sa mga kontrabando base sa flagrante delicto kon plain view doctrine.
Miresulta kini sa pagka-aresto sa driver nga si alyas Francis, 40-anyos, minyo, residente sa Barangay Rizal, Buenavista, ug alyas Mark, 36-anyos, minyo, pusher ug residente sa P-2, Brgy. Triangulo, lungsod sa Nasipit, parehong sakop ning lalawigan.
Sigon ni Agusan del Norte Police Provincial Office spokesperson PLt. Ella Mae Batobalonos, gipanaog ang duha dihang sa gihimong plain view inspection, nakitang duna’y gi-tuck in nga armas sa iyang hawakan human niini gi-atras ang gilingkurang passenger seat.
Nasayrang pa-deliver matud pa sa duha ang 19 ka sachets sa shabu nga nakuha gikan sa ilang posisyon gikan dinhi sa Butuan.
