BUTUAN CITY – Wala ra’y napulo ka adlaw human nakagawas sa prisuhan human nakaserbisyo og 14 ka tuig nga pagkabilanggo nga hukom sa korte sa mga kasong pagpatay ug ubang malisyusong buhat, subling gisikop sa kapulisan sa Candijay, Bohol, ang 40-anyos nga ex-convict tungod sa paglugos sa iyang kaugalingong inahan nga 61-anyos na ang panu-igon.
Sigon sa kapulisan, natigayon kini niadtong Septembre 27, siyam ka adlaw human siya nakagawas sa bilangguan niadtong Septembre 18 ning tuiga.
Base sa record sa kapulisan, ang suspetsadong gitago lang sa pangalang Ondoy, mipa-uli matud pa sa ilang balay nga hubog pasado alas-5:00 sa sayong buntag ug dihang nakita niya ang iyang inahang natulog, iya kining gilugos ug human nakapabuhagay sa ka-init sa iyang lawas, adiser na kini nagmahay ug nakahilak apan nabaharan pa niini ang biktima nga patyon kung musumbong sa iyang gihimo.
Apan mas mipatigbabaw ang kasibot sa inahan nga mahatagan og hustisya ang iyang nadangatan rason sa pagsumbong gilayon niya sa kapulisan.
