BUTUAN CITY – Hingpit nang napasakaan og mga kasong paglapas sa sections 5, 11 ug 12 sa Republic Act 9165 pinaagi sa inquest proceedings, ang Agusanon shabu queen human kini nadakpan sa Camiguin Islands ning mi-aging adlaw ug nakuhaan og kapin sa 1.5-milyunes pisos nga kantidad sa ilegal nga druga.
Gi-ila ni Dindo Abellanosa, tigpamaba sa Philippine Drug Enforcement Agency kon PDEA-Caraga, ang nadakpan nga si Ruby Maputi Gerona, 40-anyos, residente sa Brgy. Sangay, lungsod sa Buenavista, Agusan del Norte. Sa eksklusibong pakighinabi ning sibyahan, gibutyag ni Abellanosa nga nadakpan si Gerona sa gilusad nga drug buy-bust operation pasado alas-kwatro sa hapon niadtong Miyerkules sa Purok 7, Brgy. Cabuan, lungsod sa Guinsiliban sa Camiguin Island province.
Nasayrang nadakpan na kini niadtong tuig 2014 apan na-dismiss ang kaso ug tungod kay mibalik sa iyang modus pagpamaligya og ilegal nga druga, subli kining nasikop sa tuig 2016 kodiin naka-avail kini og plea bargaining agreement rason nga nakagawas.
Niadtong July 14 ning tuiga, gisikop ang iyang igsoon sa Tagum City nga si Remelyn Mapauti kinsa nakuhaan og tunga sa kilong shabu. Anaa siya sa maong crime scene apan wala ma-apil pagkasikop tungod sa kakulang sa basehan ilabina nga ang iyang igsoon lang ang subject sa search warrant.
Dinhi na siya gipanid-an sa ilang pwersa hangtud nga nadakpan kini sa ilang operasyon kondilin nagpositibo usab kini sa drug test.
