BUTUAN CITY – Misamot pagdagsa karon ang katawhan sa Paris, France pila ka adlaw na lang adiser ang 2024 Paris Olympics opening nga himoon karong Hulyo 26, adlaw’ng Biernes oras sa Pilipinas.
Gawas sa mga Pranses nga mga opisyales ingon man mga trabahante nga gabahis-bahis sa syudad, dagsa na usab ang mga turista nga gustong mosaksi sa moang pinakadako nga sporting event sa kalibutan, dugangan pa sa mga atleta, kansa ang uban, nangabot na sa maong dapit sukad pa ning nakalabayng bulan alang sa mga training camps.
Sumala ni Bombo International Correspondent sa Paris, France Genelyn Chanjuenco Zeid, kinsa usa usab sa mga Olympic volunteers, ningsamot kabug-at ang dagan sa trapiko sa maong syudad kansa layo ra kung itandi sa mga normal nga summer sa France.
Dugang niini, sukad niadtung Hulyo 18, kansa maoy opisyal nga pagsugod sa Olympic season, halos dili na masakyan ang mga trains tungod sa mga nagpunsisok nga katawhan. Bisn siya nagproblema na kung unsaon pag-abot sa Olympic site karong semanaha isip volunteer worker tungod sa bug-at nga dagan sa trapiko.
Dugang pa ni Genelyn nga gani, bisan sila nga mga Pilipino nga atua na sa Paris nagpuyo, dili na makagamit sa ubang mga trains nga kanhi nila ginasakyan gikan sa ilang mga trabaho pauli sa ilang tagsa-tagsa ka panimalay tungod na usab sa ka istrikto sa seguridad, kansa bugtong mga trabahante na lang sa olimpyada o kaha mga atleta ang pasakyon niini.
