BUTUAN CITY – Ginegar ni Pastor Joseph Montefalcon ang mga posibilidad nga hayan duna matud pa siya’y kalabutan sa pagpusil-patay sa magti-ayong Hallasgo ning mi-aging semana didto sa Purok 5, Brgy. Amparo ning siyudad sa Butuan.
Kini human nasuta gikan kang Kapitan Rowena Cantancio nga siya ang gipatawag sa magti-ayong Dina ug Sulficio Hallasgo, parehong residente sa Purok-7, Brgy. Doongan ning siyudad alang sa hearing kondiin wala siya makatambong.
Una nang gibutyag ni Kapitan Cantancio nga wala madayon ang hearing human mihangyo si Pastor Montefalcon nga ire-schedule kini tungod kay duna siya’y tambungang meeting rason nga nasabutan nila tali sa mga reklamante nga himuon unta kini karong semanaha.
Gipasabot sa kapitan nga pipila na ka mga residente sa Purok 5 sa ilang barangay nga sakop na sa asosasyon ang gipatawag sa magti-ayong Hallasgo tungod kay sila man ang duna’y Special Power of Attorney sa 5 ka ektaryang luna nga gitukuran sa kompanyang Papermills.
Samtang gibutyag usab ni Pastor Montefalcon nga daghang mga residente sa Purok 5 sa maong barangay ang gipatawag ni Mrs. Hallasgo ug nataymingan lang nga sa iya nang eskedyol, wala siya makatambong tungod kay gi-una niya ang meeting kansa gipahangyo na matud pa niyang daan, sa iyang asawa.
Dili matud pa niya mahimo ang maong pagduda tungod kay pro-life siya gawas sa kamatu-urang supak siya sa abortion ug mas labaw na sa buhi na daan nga mga tawo.
