BUTUAN CITY – Wala magdahom si titser Queenie Jane Cagas- de Lara sa Tangkulan Elementary School sa Brgy. Tangkulan, lungsod sa Damulog, lalawigan sa Bukidnon nga mag-viral ang ilang graduation song nga gi-ilisdan lang niya og mga lyrics kansang tono gikuha niya sa kantang ‘”At Ang Hirap’ ni Angeline Quinto.
Sa eksklusibong pakighinabi sa Bombo Radyo Butuan, gibutyag ni titser Quennie Jane nga ikaduhang tuig na niya kining gihimo apan karong tuiga lang nag-viral ang ginama niyang graduation song.
Gipadayag pa niining wala sa iyang plano ang paghimo og kaugalingong lyrics alang sa graduation song sa ilang mga elementary graduates karong tuiga, tungod kay mag-maternity leave na siya, usa ka semana adiser niya kini gitudlo.
Apan ang iyang kasibot nga mapasalamatan sa mga pupils ang pag-antus sa ilang mga ginikanan, maoy nakapa-aghat kaniya pag-compose og mga lyrics niini sulod lang sa usa ka adlaw nga iya gilayong gitudlo sulod sa usa ka semana.
Gihimong inspirasyon ni titser Quennie Jane pag-compose sa mga lyrics, ang iyang kasinatian sa unom ka tuig niyang pagtudlo sa usa ka tunghaan sa bukid nga bahin sa Bukidnon kondiin mutabok pa siya og sapa ug mubaktas pa og usa ka oras adiser maka-abot sa tunghaan.
Mas naka-inspire kaniya ang nasaksihang pag-antus sa mga ginikanan pagpatungha sa ilang mga anak bisan pa man sa kawad-on aron lang sa inanay, makab-ot ang ilang mga pangandoy sa kinabuhi.
