BUTUAN CITY – Permado na ni Presidente Ferdinand Bongbong Marcos Jr. ang balaod nga nag bawal sa “no-permit-no-exam” policy sa mga eskwelahan sa Pilipinas.
Ang Republic Act No. 11984 o ang “No Permit, No Exam Prohibition Act” epektibo sa tanang pampubliko ingon man pribadong eskwelahan sa nasod, gikan sa Elementarya ngadto na sa Kolihiyo ug bisan pa man sa mga technical-vocational institutions. Ang nasangpit nga balaod nagmando sa tanang institusyon o eskwelahan sa Pilipinas nga tugotan gihapon ang mga kabataan nga maka kuha sa ilahang mga periodic exams o kaha sa mga final exams bisan kon wala kini pambayad sa ilahang mga matrikula, rason nga mamahimo nang maka exam ang mga estudyante bisan og wala pa kini nakabayad, o kulang pa ang gibayad sa ilahang mga balayronon sa eskwelahan.
Alayon niini, gimanduan usab sa pangamhanan ang Department of Social Welfare and Development kon DSWD nga sutaon kon kinsa kadtung mga estudyante nga nag-atubang sa kawad-on o mga dunay gisagubang nga problema sama nalang sa mga bag-ohay nakasinati sa mga kalamidad, arun nga mahatagan kini og certificate sa nasangpit nga ahensya sa ingon nga mamahimo gihapon silang maka exam bisan walay pambayad, o kaha mamahimo usab nilang makuha ang mga importanteng papeles sa eskwelahan nga walay bayad.
Alang usab sa mga eskwelahan, mamahimo gihapon kining maka hatag og mga promissory notes ngadto sa mga estudyanteng dili pa maka bayad sa ilahang obligasyon, o kaha mogamit og uban pang mga legal ingon man administratibong remedyo isip pagpanukot sa mga kinahanglang bayaran sa estudyante. Ang maong balaod mamahimong epektibo 15 ka adlaw human kini ma publish sa Official Gazette.
