BUTUAN CITY – Gikumpirma ni Dindo Abellanosa, tigpamaba sa Philippine Drug Enforcement Agency kon PDEA-Caraga nga anaa na sa luwas nga kahimtang ug anaa na usab sa ilang kostudiya ang babayeng drug personality nga misulay paglaslas sa iyang li-og atol sa ilang anti-illegal drugs operation ning mi-aging gabii sa Purok 3, Ambangan, Brgy. Ambago ning siyudad sa Butuan.
Miresulta kini sa pagkasikop sa managsoong Jean Consigna, usa ka overseas Filipino worker ug manghod niining si Jerson Consigna, parehong nag-abang sa balay diin gihimo ang operasyon nga miresulta sa pagkakumpiska sa 70-gramos sa suspected shabu.
Sa eksklusibong pakighinabi sa Bombo Radyo Butuan, gibutyag ni Abellanosa nga atol sa ilang inventory, nagsige matud pa og hangyo si Jean nga mugamit sa pansayan nga gi-ubanan usab sa babayeng apil sa arresting team.
Naglayog matud pa ang duha dihang gikuha sa suspetsado ang cutter nga anaa sulod sa pansayan tungod kay gisulay man kini paglaslas sa iyang li-og.
Aron masigurong mahimo ang iyang plano, gidul-it sa suspetsado ang iyang ulo padulong sa cutter hinungdan nga nasamad kini apan dili delikado sa iyang kinabuhi ang samad nga na-angkon.
Apil sa narekober ang walo ka sachets sa suspected shabu apil na ang buy bust item nga nagkantidad og 16-mil pisos ug ang pito ka pakete sa suspected shabu nga gibana-banang nagkantidad og 210-mil pisos.
