BUTUAN CITY – Hingpit nang nasikop kaganinang buntag sa mga otoridad ang drug den maintainer nga misibat atol sa pag-serve unta sa search warrant pasado alas-3:45 kagahapon sa hapon sa Purok 7, Brg. Limaha ning siyudad sa Butuan.
Kini human siya nakig-alayon sa mga opisyal sa barangay alang sa iyang malinawong pagtahan.
Naila ang nadakpan nga si Aurelio Lawan Jr., duna’y ka-ipon ug napa-ilalom na sa drug test uban sa pag-abag sa iyang amahan ug ka-ipon.
Sigon ni Atty. Randy Agustin, legal counsel sa Philippine Drug Enforcement Agency kon PDEA-Caraga, nadakpan sa ilang operasyon kagahapon ang mga bisita sa drug den ni Lawan nga sila Randolph Madelo, Jolina Cagnaan, Julius Amoguis, Noel Cuenca ug William Ortiz ingon man ang iyang trabahante sa drug den nga si Michelle Burias, kinsa na-rehab na kaniadto.
Ilang narekober gikan sa drug den ang gibana-banang 15-gramos sa suspected shabu nga gibana-banang nagkantidad og 102-mil pisos ingon man mga drug paraphernalia.
Nangayo og despensa si Atty. Agustin sa mga tawo sa maong dapit atol sa ilang operasyon tungod kay naka-full battle gear uniform sila.
Kini tungod na usab sa ilang nadawat nga taho nga armado ang subject sa searcch warrant nga si Lawan kinsa notado na matud pa nga magpabuto higayong dili makabayad ang iyang mga saligando sa pagpamaligya sa ilegal nga druga.
Atubangon matud pa sa mga nadakpan ang mga kasong paglapas sa sections 6, 7, 11 ug 12 sa Article II sa Republic Act 9165 kon mas nailang Dangerous Drugs Act of 2002.
