BUTUAN CITY – Target karon sa Pilipinas nga mahimo nang rabies-free pag-abot sa tuig 2030 rason nga padayon ang rabies awareness and advocacy campaign sa gobyerno pinaagi sa pag-obserba matag-buwan sa Marso sa Rabies Awareness Month kondiin karong tuiga, ilawom kini sa temang ‘Rabies-free na pusa’t aso, kaligtasan ng pamilyang Pilipino’.
Sa eksklusibong pakighinabi ning sibyahan, gibutyag ni Agusan del Norte provincial veterinarian Dr. Belen Aruelo nga ubay-ubay nga mga kalihukan ang ilang himuon nga sugdan karong adlawa sa pagpangbitay nila og mga tarpaulins subay sa maong kampanya. Sundan kini sa anti-rabies vaccination sa kalungsuran kondiin target nilang makabakuna og 80-porsiento sa populasyon sa mga iro ug iring sa kada-lungsod o kaha komunidad.
Kini subay na usab sa ilang target nga wala na’y matalang kaso sa rabis sa kada-lungsod nga maoy basehan nga madeklara kining rabies-free. Mapasalamaton si Dra. Aruelo tungod kay suportado sa probinsyal nga panggamhanan pagpanguna ni Governor Ma. Angelica Rosedell Amante ang maong programa. Kamatu-uran niini ang paggahin kada-tuig og mga anti-rabies vaccines aron magamit sa ilang pagpamakuna sa mga binuhing kahayupan.
