BUTUAN CITY – Pangunahan ni Pangulong Ferdinand Marcos jr ang pagpanghatag og titulo sa yuta ngadto sa 2,769 ka mga benipisyaryo ingon man mga makinaryas panguma sa probinsiya sa Agusan Del Sur karung adlawa.
Sa eksklusibong pakighinabi sa Bombo Radyo Butuan, gipadayag ni Undersecretary Amihilda Sangcopan sa Office of Mindanao Affairs sa Department of Agrarian Reform kon DAR, mu-abot sa 4,659 ka ektaryang basakan ang ihatag ngadto sa mga Agrarian Reform Beneficiaries nga makabenipisyo usab sa P203.3M nga support services nga ihatag sa pangulo.
Lakip sa maong aktibidad nga tambungan ni Pangulong Marcos jr mao ang pagturn-over sa 8 ka mga Farm-to-Market Roads nga nagkantidad og P194M nga gipondohan sa Department of Agrarian Reform kon DAR.
Sumala ni Sangcopan, 63 ka items sa farm machineries nga nagkantidad og P8.9M ang itunol ngadto sa 11 ka mga Agrarian Reform Beneficiaries Organization.
Human niini, ang Department of Agrarian Reform na usab ang mohimo og monitoring aron masayran kung unsa ang impact sa mga makinaryas ngadto sa mga mag-uuma.
Mensahe na lang niini sa mga benipisyaryo nga hatagan og importansiya ang gitunol sa gobyerno ilabina karung dili na lang sila simple nga mag-uuma kundi kabahin na sa sektor sa ekonomiya.
