BUTUAN CITY – Gipa-ilalom na sa state of calamity ang lungsod sa Veruela, Agusan del Sur tungod sa kalapad sa kadaut nga hatud sa mga pagbaha tungod sa pila ka adlaw nga mga pag-ulan nga mugna sa shearline.
Sa eksklusibong pakighinabi sa Bombo Radyo Butuan, gibutyag ni Clyde Bonita, ang hepe sa Veruela Municipal Disaster Risk Reduction and Management Office kon MDRRMO nga anaa gihapon sa critical level ang baha sa ilang lungsod nga naka-apekto sa 12 nila ka mga barangay kondiin nakasinati og grabeng pagbaha ang Brgy. Poblacion, Binungan ug San Gabriel tungod kay sikbit ra kini sa Agusan River.
Nagpadayon ang ilang pagpang-apod apod sa mga relief goods samtang suspendido pa gihapon ang trabaho ug klase sa tanang ang-ang sa mga pribado ug pampublikong tunghaan tungod sa kadelikado pa sa sitwasyon ilabina nga duna pa’y mga dalan nga dili maagi-an tungod sa kadako pa sa tubig-baha.
