BUTUAN CITY – Laing pagpamusil na usab sa Prosperidad, Agusan del Sur ang mikutlo sa kinabuhi ni Efren Layno Galdiano, 67-anyos, minyo, mag-uuma ug residente sa P-5 Brgy. Los Arcos, Agusan del Sur nga natigayon pasado alas-sais kagabii.
Natigayon kini bisan og wala pa masulbad ang unang kaso nga mikutlo sa kinabuhi sa usa ka retiradong engineer.
Migawas sa inisyal nga imbestigasyon nga gikan pa ang biktima sa merkado ug dihang nakasulod na sa iyang balay, kalit lang kining gipusil sa duha ka wala mailhing tawo sa tulo ka higayon nga mi-igo sa nagkada-iyang parte sa iyang lawas nga miresulta sa iyang kamatayon.
Human sa insidente, daling misibat ang mga suspek padulong sa wala matinong direksiyon samtang ang patay nga lawas sa biktima, gihaya na sa usa ka punerarya sa maong lungsod.
Narekober gikan sa crime scene ang duha ka gitirang cartridge case ug usa basiyo sa . 45 kalibre nga pistola.
