BUTUAN CITY – Gipalig-on na sa House of Representatives sa botong 265 nga pabor, walay misupak ug tulo ang abstain, ang pagpalagpot kang Negros Oriental 3rd District Rep. Arnolfo Teves Jr. isip house member.
Girekomenda sa House Committee on Ethics and Privileges sa pagpanguna ni committee chairman ug COOP NATCCO Partylist Rep. Felimon Espares ang pagpalagpot kang Teve human ang makuting pagsunod sa patas ug haom nga proseso tungod sa paglapas sa ilang Code of Conduct.
Gitin-aw ni Espares nga wala gihimong basehan ang designation kang Teves isip terorista diha sa iyang pagkatangtang.
Rason sa ilang rekomendasyon sa pagpalagpot kang Teves ang padayong paghangyo niini og political asylum sa Timor Leste; padayon nga pag-absent niini sa Kamara, ug ang indecent behavior niini sa social media partikular ang pagsayaw niini nga nakasando ug boxer short lang.
