BUTUAN CITY – Giklaro ni Police Sergeant Randy de Ocampo, imbestigador sa kapulisan Esperanza, Agusan del Sur nga wala’y foul play sa pagkalumos-patay sa 8 ug 12-anyos nga managsoon ning mi-aging adlaw samtang naligo sa Agusan River.
Sa eksklusibong pakighinabi ning sibyahan, gibutyag sa opisyal nga parehong dili makamaong mulangoy ang managsoong Jimboy Calza, 12-anyos ug ang 8-anyos nga manghod niining si Ariel Aplaca, residente sa Purok 14, Sitio Mabaw, Brgy. Dacuta, sakop sa maong lungsod.
Base sa ilang imbestigasyon, ka-uban matud pa ang duha sa ilang inahan nga nanghagdaw og mais ug wala na nabantayan nga midalikyat diay pagligo sa sabang sa suba nga duol ra usab sa ilang panimalay.
Gibadlong matud pa kini sa nakakita kanila apan mibalik sa agi.
Dihang wala na makita sa ilang inahang si Alma Calza didto na gisubay sa suba pagkahapon ug napalgan na lang nga ang abandonang baruto anaa na taliwa sa sabang nga nagkulob na rason sa gilusad gilayon nga search operation.
Apan kagahapon na sa buntag nakit-an ang mguwang didto ra sa maong lungsod samtang kagahapon sa udto usab ang manghod nga naglutaw na sa Agusan River didto sa Las Nieves, Agusan del Norte.
