BUTUAN CITY – Wala’y la-umang maayong report ang Partido Manggagawa alang sa ilang sektor sa ikaduhang State of the Nation Address kon SONA ni Pangulong Ferdinand ‘Bongbong’ Marcos Jr. unyang hapon.
Sa exclusive interview sa Bombo Radyo Butuan, gipadayag ni Partido Manggagawa spokesperson Wilson Fortaleza nga kini tungod kay wala usa’y gisaad ang pangulo alang kanila sa una niining report sa ka tawhan.
Wala matud pa sila’y nakitang kongkretong lakang nga gipatuman ang pangulo alang kanila.
Bugtong ang bag-ong logo lamang matud pa sa ‘Bagong Pilipinas’ campaign sa Malakanyang ang ilang nakita sa usa ka tuig nga pagpangatungdanan ni Pangulong Ferdinand ‘Bongbong’ Marcos Jr.
Dugang pa ni Fortaleza, wala usab sila’y nakitang bag-ong programa nga gipatuman sa administrasyong Marcos tungod kay kadaghanan niini, niadto pang nakalabay’ng mga administrasyon gipatuman.
Ang bugtong mapasigarbo matud pa sa pangulo mao ang Maharlika Investment Fund Act nga dili gilayon mapahimuslan sa mga Filipino karon.
