BUTUAN CITY – Anaa na sa kostudiya sa Butuan City Police Station kon BCPS-1 ang driver sa usa ka bus unit sa Bachelor Express Incorporated nga nakabangga-patay sa usa ka senior citizen na nga gwardiya kaganinang alas-dos sa kaadlawon sa national highway sa Purok 20, Brgy. Baan Km. 3 ning siyudad sa Butuan.
Naila ang biktimang si Romeo Damian, 61-anyos, minyo ug residente sa Purok 5, Brgy. Lemon ning siyudad sa Butuan samtang ang responsableng driver nailang si Crisanto Bullo Mangmang, 35-anyos, residente sa Purok 7, Brgy. Tabon, Bislig City.
Sa eksklusibong pakighinabi sa Bombo Radyo Butuan, gipadayag ni BCPS-1 spokesman Police Executive Master Sergeant Rey Maderal, ulahi na matud pa nga nakita sa driver ang biktima nga nakatabok na sa fast lane sa dalan ug anaa na dapit sa iyang gidrayban tungod sa kay naka-high dim matud pa ang suga sa iyang kasugat.
Iya gilayon kining gitan-aw ug dihang nakita nga nagbuy-od na ang biktima, mideretso na siya sa Maneuvering Unit sa 2nd Company sa Butuan City Mobile Company nga nakabase sa Brgy. Ampayon aron pagtahan sa iyang kaugalingon.
Una nang gisaysay sa anak sa biktima nga si Erwin Damian nga nagbaktas na ang iyang amahan padulong uli human mihunong sa national highway.
Sa iyang panglantaw, kung narespondihan gilayon unta ang maong hitabo, hayan maluwas pa ang iyang amahan human nasayrang tungod sa kawala’y nagpahibalo gilayon sa Operation Center sa Butuan City Disaster Risk Reduction and Management Office kon CDRRMO, rason nga halos duha pa ka oras ang milabay adiser narespondihan ang maong hitabo.
