BUTUAN CITY – Mahinungdanon sa komunidad sa tibuok kalibutan ang media rason nga gisa-ulog karong adlawa ang ika-30 ka anibersaryo sa World Press Freedom Day.
Sa eksklusibong pakighinabi sa Bombo Radyo Butuan, gipadayag ni PLtCol. Renel Serrano, tigpamaba sa Dinagat Islands Provincial Police Office nga bisan og 30 ka tuig pa lang ang pagsa-ulog sa World Press Freedom day, apan ang kampanya niini, dugay nang gipatuman sa Pilipinas pinaagi sa 1987 Philippine Constitution.
Sulod sa 50 ka tuig na nga operasyon sa Bombo Radyo Philippines, gipanabati sa entradang bahin sa programang Zona Libre ang Article 3 Section 4 sa Bill of Rights diin nakalatid ang katungod sa prensa ug pagpadayag nga dili angayang babagan.
Gani iya kining na-memorize tungod sa taud-taud niyang pagkupot sa maong programa dihang usa pa siya ka journalist ning sibyahan.
Karong anaa na siya sa han-ay sa nasudnong kapulisan, dako ang iyang kalipay ilabina dihang sa una niining command conference tali sa mga regional directors, gi-emphasize niini ang kamahinungdanon sa media sa pagserbisyo nilang mga pulis.
Gikonsidera pa niini ang media nga watchdog sa tanang mga law enforcement agencies sama sa PNP aron mabantayan ang ilang mga lihok nga wala na magsubay sa saktong dalan.
