BUTUAN CITY – Gimando na ni Surigao del Sur Governor Alexander ‘Ayek’ Pimentel ang forced evacuation ngadto sa tanan nilang mga local government units tungod sa lapad nga pagbaha nga hatud sa wala’y hunong nga pagbundak sa ulan.
Sa esklusibong pakighinabi sa Bombo Radyo Butuan, gipadayag ni police provincial director Col. Dennis Siruno nga ning mi-aging mga adlaw, ang mga lungsod lang sa San Miguel, Carrascal, Cantilan, Madrid, Carmen ug Lanuza ang nagpatuman og pre-emptive evacuation, apan karon, forced evacuation na ang gimando sa gobernador human gi-isa sa lalawigan ang red rainfall warning.
Gikumpirma usab sa opisyal nga sa ilang lalawigan, duna na’y natalang patay human nalumos kagahapon sa alas-tres sa kaadlawon sa may Purok Pinag-aralan 2, Brgy. Maitom sa Tandag City.
Gi-ila sa opisyal ang biktima nga si Bernadith Bagnol Molina, 46-anyos, residente sa maong lugar.
Migawas sa asuy sa bana sa biktima nga kuhaon unta sa biktima ang ilang binuhing baboy duol sa suba apan nadakin-as kini ug nahulog rason nga na-anod sa tubig-baha ug napalgan kini pagka-alas nueve na sa buntag, nga naglutaw sa suba dapit sa tilay ug wala na’y kinabuhi.
