BUTUAN CITY – Wala na makasa-ulog pa og Pasko ang duha ka indibidwal human sila namatay sa managlahing disgrasya sa bisperas pa lang sa Pasko dinhi sa dakbayan sa Butuan.
Unang namatay si Armando Ariosa, residente sa Purok 4, Brgy. De Oro ning siyudad human naka-angkon og fatal injuries dihang mibangga ang iyang gimanihuang motorsiklo sa wing van pasado alas-5:40 kagahapon sa hapon sa may Purok 2 sa susamang barangay.
Nasayrang mitabok sa pikas lane ang motorsiklo sa biktima rason nga wala na kini makalikay pa sa kasugat nga van.
Samtang pagka-alas-11:30 kagabii, mibangga usab sa kasugat nga motorsiklo sa may Purok 1, Brgy. Lumbocan ang gimanihuang motorsiklo ni Alren Gacosta, 25-anyos, ulitawo ug residente sa Purok 11 sa susamang barangay.
Manghod kini sa gipatay nga SK chairman sa maong barangay nga si Nelbert Gacosta niadtong Hunyo ning tuiga.
Samtang kritikal usab karon sa Butuan Medical Center ang driver sa kabangga niining motorsiklo nga si Pacquito Tagoctoc, 25-anyos, ulitawo ug residente sa Purok 2, Brgy. Ambago, parehong sakop ning siyudad sa Butuan.
