BUTUAN CITY – Nakatala og 96.9-porsientong employment rate ang Caraga Region base sa Agusto 12 ning tuiga nga survey sa Philippine Statistics Authority kon PSA human ang halos tulo ka tuig nga pagpahagba sa COVID-19 pandemic sa atong ekonomiya.
Kini timaan matud pa sa inanay nang pagrekober human ang pagsira sa mga negosyo ug sa nawad-an og trabaho tungod sa taas nga mga kaso sa COVID-19.
Sa eksklusibong pakighinabi sa Bombo Radyo Butuan, gipadayag ni Atty. Joffrey Suyao, ang regional director sa Department of Labor and Employment kon DOLE, base sa datus gikan sa PSA, karong tuiga inanay nang misaka ang rata sa ga duna’y trabaho ning rehiyon tungod na usab sa pag-abli og balik sa nanira nga mga negosyo.
Tungod niini, ang unemployment rate sa Caraga Region, anaa na lang sa 3.1-porsiento kansa indikasyon sa inanay nang pagbangon sa atong ekonomiya.
Nag-una matud pa nga employment driver ning rehiyon ang industriya sa mina nga maoy milahutay panahon sa pandemya.
Sa pagbalik na karon sa new normal, mas mikusog karon ang retail trade nga gi-abagan usab sa sektor sa agrikultura.
Gidugang sa opisyal nga ubay-ubay karon ang mitumaw nga bag-ong trabaho kon mga gitawag nga self-employed kansa internet-based kansang mga employers atua gawas sa nasud gawas pa sa mga online sellers nga maoy daghan karon.
