BUTUAN CITY – Nagbahad ang Estados Unidos nga ang bag-ong price cap sa Russian oil, muputol gilayon sa pinaka-importanteng tuburan sa kita ni President Vladimir Putin.
Sigon ni US Treasury Secretary Janet Yellen, ang price cap kansa opisyal nang gi-aprubahan sa Western allies, nakab-ot human ang pila ka buwan nga subsob nga trabaho.
Ang nasangpit nga price cap maoy mupa-undang sa mga nasud pagbayad og kapin sa 60-dolyares matag-bariles alang sa seaborne exports sa Russian crude oil kansa mu-epekto sa Disyembre 6 -oras sa Pilipinas o kaha mas sayo pa.
Ang mga low ug medium-income countries nga maoy nagrabehan sa taas nga presyo sa lana ug mga pagkaon ang makabenepisyo sa maong price cap.
Mahimo usab kining babag sa pinansyal nga aspeto ni Russian President Vladimir Putin ug maglimita sa pundong iyang gigamit aron punduhan ang iyang brutal nga pagpanakop sa Ukraine.
Ang price cap giduso niadtong September sa G7 group of nations nga gilangkuban sa US, Canada, UK, France, Germany, Italy, Japan ug sa EU, sa tinguha nga ma-igo ang abilidad sa Moscow pag-finance sa giyera sa Ukraine.
Gi-aprubahan kaganina sa European Union ang price cap kansa nagkinahanglan sa paguyon sa tanang member states human gi-agni ang Poland pagsuporta niini.
