BUTUAN CITY – Misaka ang presyo sa mga noche buena products dinhe sa rehiyon sa Caraga. Kini ang gikumpirma ni Atty. Kurt Montero, Officer-in-Charge kon OIC sa Consumer Protection Division sa Department of Trade and Industry kon DTI-Caraga sa pakighinabi ning sibyahan.
Sigon sa opisyal dunay bag-ong suggested retail price kon SRP sa mga produkto nga sagad andamon sa panahon sa pasko nga gipagawas niadtong Nobyembre 23. Hinoon dili muabot sa 10 porsiento ang pagtaas sa presyo sa Hamonada, Fruit cocktail, sandwich spread, pasta, macaronie, spaghetti sauace og cream.
Giklaro ni Atty. MOntero nga ang maong presyo gikan sa manufacturers sa maong produkto nga tinuig nilang ipagawas. Makita ang kumpletong listahan sa mga noche buena products sa dti.gov.ph/consumer.
Tungod niini, gitambagan sa abogado ang mga kunsumante nga mag-budget ilabina kay mosaka usab ang presyo sa mga produkto ugaling mosaka ang presyo sa gasolina nga atong nasinatian karun.
Mas maayo usab nga e-canvass daan kung kinsa nga tindahan ang ubos og presyo. Lakip sa angayang buhatan sa mamalitay mao ang pagcheck sa label sa produkto kung dili ba kini expired.
Samtang ning panahon sa pasko nga na-andan ang pagbutang og mga christmas lights, gitumbok ni Atty. MOntero nga kinahanglang seguruhon nga ang palitong christmas lights dili substandard aron makalikay sa posibleng sunog. Mahibal-an kini pinaagi sa makitang PS mark o ICC Stickers.
