BUTUAN CITY – Padayon pa ang gihimong imbestigasyon sa kapulisan sa Bayugan City sa lalawigan sa Agusan del Sur sa pagbanhig kang Police Staff Sergeant Arnold Cafe Tanjay, 40-anyos, pasado alas-7:20 kagabii sa gawas nga bahin sa iyang panimalay sa Purok 3, Brgy. Mabuhay ug kasamtangang na-destino sa Regional Intelligence Division sa Police Regional Office kon PRO-13
. Sa eksklusibong pakighinabi sa Bombo Radyo Butuan, gibutyag ni PMajor Jennifer Ometer, tigpamaba sa PRO-13, nakabalos pa pagpusil ang biktima ngadto sa suspek kinsa gitu-uhang natarantar tungod kay nabilin man sa pagsibat niini ang usa ka KG9 mm luger uban sa holster niini.
Sa gihimong follow-up operation sa kapulisan, apil sa narekober gikan sa crime scene ang 12 ka mga gitira nang cartridge cases uban sa usa ka bala sa maong armas ug usa ka magazine nga duna’y sulod nga 21 ka mga bala ug laing unom ka mga gitira nang cartridge cases sulod sa sakyanan sa biktimang pulis.
Kini gawas pa sa tulo ka mga gitira nang cartridge cases nga gitira sa gilay-ong 400-metros gikan sa crime scene.
Ubay-ubay nga mga anggulo ang padayon pang gitutukan sa imbestigasyon ilabina nga daghang mga kaso ang gikuptan sa opisyal nga hayan mao ang hinungdan sa pagtiro kaniya apil na niini ang posibleng kalambigitan sa rebeldeng New People’s Army kon NPA.
