BUTUAN CITY – Subay sa pagpatuman sa usa ka adlaw nga Oplan Simultaneous Anti-Criminality Law Enforcement Operations kon Oplan SACLEO kagahapon sa alas-1:30 sa udto, hingpit nga nakalingkawas gikan sa pagpamanhig ang mga intelligence operatives sa Municipal Police Station sa Tago, Surigao del Sur sa gihimong road blocking sa mga rebeldeng New People’s Army kon NPA.
Sa eksklusibong pakighinabi sa Bombo Radyo Butuan, gipadayag ni PMajor Jennifer Ometer, tigpamaba sa Police Regional Office kon PRO-13 nga kalit lang gipa-arakan ang maong mga operatiba sa gibana-banang napulo ka mga armadong sakop sa gitu-uhang mga sakop sa Guerilla Front 30A sa Northeastern Mindanao Regional Command ilalom kang Kumander Nico human nakit-ang mitipas og dalan ang mga pulis nga sakay sa commuter van.
Base sa asuy sa operatiba, dihang naka-abot sila sa Sitio Cadlum, Barangay Cabangahan, sa lungsod sa Tago, ila nang namatikdan nga anaa sa dalan ang armadong kalalakin-an rason nga dali silang mi-iktad gikan sa ilang gisakyan ug mipadulong sa bukirang bahin sa mang lugar.
Samtang sa susamang adlaw usab, gisundo gilayon sa ilang mga ka-ubanan ang nasangpit nga mga pulis didto sa kasikbit lang nga Barangay Alba, kondiin luwas silang naka-abot sa ilang police station.
Tungod niini, daling gi-alerto ang tanang yunit ilalom sa Surigao del Sur – Police Provincial Office ug nakig-alayon gilayon sila sa 75th Infantry Battalion, Philippine Army alang sa tukmang pag-aksyon.
Gikumpirma usab niini nga wala’y mga giparang sibilyan ang gipasakitan sa nag-checkpoint nga mga rebelde.
