BUTUAN CITY – Mikutlo sa duha ka kinabuhi samtang unom ang angol sa nahitabong disgrasya sa dalan kaganinang alas 8:00 sa buntag sa may Purok 7 Kalingayan, Brgy. Bayugan 3, sakop sa lungsod sa Rosario, Agusan Del Sur.
Naila ang namatay nga sila Flora Lagaras ug Ernesto Dipay taga Sitio Lumaban, Brgy. Rizal, Surigao City kansa gideklarang dead-on-arrival sa dihang gidala sa Bunawan District Hospital.
Samtang unom usab ang gitambalan sa hospital nga nailang sila Archie Dipay, ang drayber sa nadisgrasyang itom nga KIA Sportage nga nagtangag sa plaka numero JCS 331 ug residente sa Sitio Lumaban, Brgy. Rizal, Surigao City og mga pasahero nga sila Matias Dipay; Dimocrito Dipay; Nimfa Dipay; Rhea Jane Dipay; og Hazel Ann Dipay parehong residente usab sa Sitio Lumaban, Brgy. Rizal, Surigao City.
Nasayran gisubay sa sakyanan ang National Highway sa Rosario, Agusan Del Sur og padulong kini sa Davao nga direksiyon, apan nakatulog matud pa ang drayber rasong pag-abot sa lugar nga nahitaboan, nawad-an kini og kontrol sa manubela rasong nahagbong sa sementadong kanal sa daplin sa dalan.
Tungod sa kakusog sa impact, naka-angkon og dili ti-aw nga mga pali og samad sa kalawasan ang mga biktima diin ang uban kanila nalagpot pa gikan sa sakyanan. Dali usab nga nakaresponde ang Search and Rescue Agusan Del Sur kon SARAS-Bayugan 3 diin gipangdala ang mga biktima sa ospital apan nakabsan sa kinabuhi ang duha sa mga niini.
Sa kasamtangan, gipahiluna na ang patay’ng lawas sa duha ka biktima samtang duna pay nagpabilin sa balay-tambalanan alang sa pagpa-alim.
