BUTUAN CITY – Pulos pagpasalamat ang gibungat ni PLtCol Michael John Mangahis, hepe sa Bayugan City Police Station human nga ilang nasakmit ang Outstanding City Police Station Award atol sa 27th Police Community Relations kon PCR month culmination kondiin ilang naka-agbat ang tanang mga city police stations sa tibuok nasud.
Sa eksklusibong pakighinabi sa Bombo Radyo Butuan, gipadayag ni LtCol Mangahis nga dili basta-basta ang ilang nakab-ot nga kalampusan tungod kay mi-agi pa sila og grabe nga mga pagsulay.
Dugang sa opisyal, ubay-ubay nga mga best practices ang ilang gihimo aron lang makabaton og maayong relasyon tali sa katawhan tungod kay importante man ang pagkuha sa ilang pagsalig kondiin gipaningkamutan nila kini og maayo aron makuha ang kooperasyon sa komunidad.
Apil matud pa sa ilang gi-adaptar ang hini-usang programa sa lokal nga kagamhanan ang ‘Bayugan on Wheels’ kondiin ang mga government offices maghatag og libreng serbisyo sa mga lagyong barangay samtang silang mga pulis ang mag-secure sa maong kalihukan.
Kini lahi pa sa ilang gipatumang Sukram program alang sa mga kaigsu-unang Muslim sa maong siyudad ga gihatagan nila og pagtagad aron dili malambigit sa mga ilegal nga kalihukan ilabina sa terorismo.
Gani mapasalamaton ang opisyal tungod kay sulod sa duha ka tuig niyang pagpatuman sa maong programa hangtud nga karong hapit na siyang mubiya sa maong lugar, wala’y mga Muslim brothers nga nalambigit sa mga ilgal nga kalihukan nga maoy iyang gipasalamatan og maayo.
