BUTUAN CITY – Gipahibalo sa kadumalahan sa Agusan Del Norte Provincial Hospital nga nahimutang sa Barangay Libertad ning siyudad sa Butuan nga temporaryo una silang dili mo-admit og pasyente human usab ang natigayong sunog sa likod nga bahin sa ospital.
Nasayrang miulbo ang sunog sa alas 7:00 kagabii sa likod sa emergency room diin na-ugdaw ang tibook bunkhouse og tulo ka transformer.
Hinoon giklaro nga luwas ang tanang pasyente human kini gelayong gipagawas aron dili mabutang sa peligro samtang paspas usab ang pagresponde sa Bureau of Fire Protection kon BFP diin naapula paglabay sa pila ka minuto ang sunog.
Kagabii nahibalik ra sa sulod ang mga pasyente. Apan sumala sa kadumalahan sa ospital nga katunga lang sa balay-tambalanan ang dunay suga sa rasong ang katunga niini gi-suplayan sa ilang generator. Hilabihang na-apektuhan sa pagkawala sa linya sa kuryente ang emergency room, triad, delivery room, operating room og ang radiology department.
Kini ang nahimong rason sa dili una pag-admit og pasyente ang hospital. Padayon pa usab nga gisuta ang hinungdan sa pag-ulbo sa kalayu lakip na ang gibana-banang damyos niini.
