BUTUAN CITY – Hingpit nang nasikop ang suspetsado sa pagpamusil kaganinang alas 3:30 sa hapon sa may Bonbon-Kinamlutan diversion road ning siyudad sa Butuan.
Tungod sa gihimong hot pursuit operation, malampusong nasikop ang suspek nga si Marjon Cupin nga taga Barangay Bonbon, Butuan City.
Sa pakighinabi ning sibyahan kang BCPO-OIC Director PLTCOL Rommel Villamor, siya mismo ang miadtu sa Butuan City Police Station-3 aron emandu ang walay hunong nga pagpangeta sa suspek samtang nangunay usab uban sa mga personahe sa City Intelligence Unit.
Una nang natigayon ang pagpamusil pasado alas 3:10 sa buntag sa may P-6A Balanghai, Brgy. Libertad, Butuan City diin ang biktima nailang si Leonardo Elvera Yumo Jr., 26-anyos. Samtang natulog ang biktima sa iyang pinuy-anan kauban ang kapuyo niini, gi-ablihan sa suspek ang bintana og gipusil ang biktima nga na-igo sa iyang wala nga hawak gamit ang wala madeterminang klase sa pistola.
Daling misibat ang suspek samtang ang biktima gidala sa Agusan del Norte Provincial Hospital alang sa medical nga atensiyon og anaa na sa luwas nga kahimtang. Gitoohang love triangle ang motibo sa pagpamusil.
Sa karun, gi-andam na ang kasong frustrated murder nga ipasaka pinaagi sa inquest proceedings batuk sa suspetsado nga gikustudiya karun sa Butuan City Police Station-3 alang sa tukmang disposasyon.
