BUTUAN CITY – Laing hikog na usab ang natala sa probinsiya sa Agusan Del Norte. Kini human nadiskubrihan ang nagbitay nga patay’ng lawas sa usa ka lalaki nga padugta na kaganinang alas 7:30 sa buntag sa may Purok-4, Barangay Bayabas, siyudad sa Cabadbaran, Agusan Del Norte.
Naila ang biktima nga si Brigido Escabosa, 70-anyos, menyu, usa ka maguuma nga residente sa maong dapit.
Sa impormasyong nakuha gikan sa Cabadbaran City Police Station, si Barangay Kapitan Joebert Sardeña ang mipahibalo ngadto sa kapulisan mahitungod sa maong insidente.
Sa inisyal nga imbestigasyon, mibiya matud pa ang biktima sa ilang panimalay padulong ngadto sa bukirang parte niadtong biernes og kaganina nakaplagan nalang kini nga nagbitay sa punoan sa kahoy gamit ang pisi nga gihikot sa liog.
Ang maong patay’ng lawas anaa na sa state of decomposition og gidala ngadto sa Cabadbaran District Hospital alang sa post mortem examination.
Una nang natala ang paghikog sa usa ka dalaga kagahapong adlawa sa Purok-7, Barangay Alubihid, lungsod sa Buenavista, Agusan del Norte.
Naila ang biktima nga si Evelyn Bagnol, 20-anyos, dalaga kansa naghikog gamit ang pisi didto sa bodega nga anaa luyo sa ilang panimalay.
