BUTUAN CITY – Padayong gisaad sa Bureau of Jail Management and Penology kon BJMP Chief nga si Jail Director Allain Iral ngadto sa publiko ang paghatag og dekalidad nga serbisyo pinaagi sa padayon nga paningkamot nga mawagtang ang mga kontrabando ilabina ang ilegal nga drugas nga ipasulod sa pasilidad.
Kini nga pamahayag, human usab sa sunod-sunod nga pagkakumpiska sa ilegal nga drugas nga ipasulod unta sa pasilidad sa BJMP-Butuan City ning semana santa.
Una nang nahitabo ang insedente niadtong martes diin nadiskubrihan ni Male Dorm Duty searcher JO1 Jun Resty Cabrera ang kontrabando nga ipalusot unta sa bisita.
Nakumpiska ang usa ka sachet nga dunay sulod sa gitoohang shabu og laing usa pa ka sachet nga dunay sulod sa mga tinabas na nga aluminum foil nga gitagoan sulod sa brown sugar. Naila ang bisita nga si Efren Erigbuagas jr 34-anyos nga taga Purok-3, Barangay New Society Village, Butuan City.
Ang maong insedente nasundan pa pagka-ugma human nasakpan ni JO3 Psychie Macagaan ang 2 ka sachet nga dunay sulod sa gitoohang shabu kauban ang 8 ka mga tinabas nga aluminum foil nga gitagoan sulod sa lechon manok nga bitbit sa dalaw nga si Aleonie Bagaipo Canasa, 18-anyos nga taga Barangay Doongan ning siyudad sa Butuan.
Ang duruha ka mga indibidwal giturn-over kini sa Butuan City Police Station-3 alang sa tukmang disposasyon samtang gi-andam ang kasong ilang atubangon.
