BUTUAN CITY – Balik na sa normal ang biyahe sa mga multicab nga duna’y intra-city routes sa nagkada-iyang bahin ning siyudad human nakakuha og provisional authority kon PA ang ilang tagsa-tagsa ka transport cooperative dihang nag-expire ang ilang prangkisa.
Kini human usab ang tago-tago nga pagpamasada sa maong mga yunit niadtong weekend human nga wala pa’y gihatag nga PA ang Land Transportation, Franchising and Regulatory Board kon LTFRB-Caraga.
Apan sa eksklusibong pakighinabi sa Bombo Radyo Butuan ngadto sa driver nga si Herminigildo Kuizon, gipadayag niini nga sa ilang gipa-ilawman nga Caraga Butuan Transport Service Cooperative kon CARBUTRANSCO, nahatagan na og provisional authority niadtong Marso 31 alang sa 34 nila ka mga yunits rason nga wala’y problema sa ilang pagpamasada karon.
Samtang gipadayag usab sa laing driver nga si Manuel Baldomar sa Balangay Transport Service Cooperative kon BALTRANSCO nga gihatagan sila og usa ka buwan nga lugway sa LTFRB aron paghikay sa ilang franchise renewal rason nga kampante silang namasada sugod kaganina.
Dakong tabang matud pa ang maong lugway aron duna sila’y mapalit nga pangkunsumo alang sa ilang pamilya.
