BUTUAN CITY – Gitoohang tungod sa personal nga problema og wala nabayrang mga utang rason sa paghikog sa usa ka pedicab driver kaganinang alas 4:00 sa hapon sulod sa pinuy-anan sa P-9, Upper Doongan, Butuan City.
Naila ang biktima nga si Teofilo G. Manlunas, 42-anyos, menyu og usa ka pedicab driver.
Base sa nakuhang impormasyon gikan sa kapulisan ning dakbayan, mihimo sa pagkutlo sa iyang kaugalingong kinabuhi ang biktima sulod sa iyang pinuy-anan gamit ang nylon nga gihikot sa iyang li-og.
Nahitabo kini samtang natulog ang iyang asawa nga dunay gipamati sa lawas.
Bisan og nagdumili na ang asawa nga ipailalom sa autopsiya ang patay’ng lawas niini, apan ang kapulisan nag-request og post mortem examination aron madetermina ang hinungdan sa kamatayon niini.
Sa kasamtangan, gipahiluna na ang patay’ng lawas sa biktima sa usa ka pribadong punerarya nga nahimutang sa Barangay Limaha, Butuan City.
