BUTUAN CITY-Sugdan na karung adlawa ang pagpatuman sa mga gikinahanglang dokumento kung musulod ning syudad sa Butuan pinaagi sa gi-amyendahang Executive Order No. 5–A.
Lakip sa mga gi-amyendahan sa lokal nga kagamhanan ning syudad alang niadtong mga mo-byahe gikan gawas sa Region, mao ang pagpakita lamang sa ilang ID ug vaccination card o vaccine certificate apan ang mga bata ubos sa 5 anyos dili na pangitaan niini nga rekisitos basta uban ang ginikanan nga mga bakunado.
Apan kung ang byahero wala pa nabakunahan o partial pa lamang ang bakuna tungod kay dunay sakit, mahimong ipakita lamang ang ID ug negatibo nga resulta sa Rapid Antigen test o kaha RT-PCR test nga gikuha sulod sa 72 ka oras adesir ang pagbyahe sa lugar diin kini gikan; ug Duly signed nga medical certificate uban ang pangalan ug contact details sa doctor.
Alang usab niadtong mga menor de edad nga 5 anyos hangtod 18 anyos kansa mo-byahe nga wala pa nabakunahan o ba kaha unang dose pa lamang, mahimong ipakita lang usab ang ID ug negatibo nga resulta sa Rapid Antigen Test o kaha RT PCR test nga gikuha sulod sa 72 ka oras adesir ang pagbyahe sa lugar diin kini gikan.
Ang maong kamanduan nahasubay sa mando sa Inter-Agency Task Force alang sa pagpakunhod sa mga kaso sa Covid-19.
Padayon gihapong gipanawagan sa lokal nga kagamhanan ning syudad nga kung mahimo, hugot nga sundon ang mga gipatumang minimum health protocols ug magpabakuna na aron makalikay sa makamatay nga covid-19.
