BUTUAN CITY -Nagpatabang sa Bombo Radyo Butuan si Junemark Butcon Alas, lumad nga taga-Brgy. Dankias ning siyudad sa Butuan ug kasamtangang nagtrabaho sa Saudi Arabia aron lang mabalik ngadto sa iyang mga ginikanan ang iyang 12-anyos nga anak nga si Lian Kim Alas kinsa niadto pang Enero 29 ning tuiga na-missing.
Sa eksklusiibong pakighinabi sa Bombo Radyo Butuan, gisaysay ni Junemark nga niadto matud pang Disyembre 25, nakit-an sa iyang amahan ang bata nga mi-ambak sa bintana ug mirason nga mangihi lamang matud pa.
Wala matud pa makumbinsi ang iyang mga ginikanan sa rason sa iyang anak hinungdan nga ila kining gipanid-an ug gisukit-sukit og maayo hangtud nga nakatug-an kini nga uyab-uyab na diay niini ang iya ra usab nga ig-agaw nga si Kenny June Tejada.
Misaysay usab matud pa ang iyang anak nga gipugos siya sa pakighilawas sa suspek niadtong Disyembre 14 ning mi-aging tuig rason nga iya kining gipa-medical sa iyang mga ginikanan diin nakumpirma nga nahilabtan gayod ang iyang anak.
Dihang nasayran sa suspek nga gipa-medical ang iyang anak, misulay matud pa kini paghikog apan na-apsan rason nga wala mahinayo nug dinhi na matud pa nasuko ang igsoon sa suspek ug gisulong ang iyang mga ginikanan ug gibaharan nga manabla.
Igo lang matud pang nakalabay ang usa ka semana, nahanaw na ang iyang anak dihang gisugo lang kini pagpalong sa lock sa ilang gripo nga anaa lang gawas sa ilang kusina ug wala na igkita pa.
Emosyunal pang gipadayag ni Junemark ang wala matud pa pagtabang sa ilang mga baarnagay officials ug sa mga pulis nga sakop sa Butuan CIty Police Station 5 sa iyang nahabilling pamilya dinhi sa Butuan aron mapapangita ang iyang anak.
Midangop na usab matud pa ang iyang mga ginikanan sa City Social Welfare and Development kon CSWD aron matabangan silang ma-secure ang iyang anak apan gibalibaran sila sa rasong aduna pa kini mga guardians hangtud nga na-abtan na kini sa pagka-missing na sa bata.
Alayon niini, naghilak siyang mi-apela sa mga tawong nagkupot sa iyang anak nga ibalik na kini kanila ingon man sa iyang anak nga mupa-uli na sa ilang piuy-anan ilabina nga nagsige na og pangita kaniya ang manghod niini.
