BUTUAN CITY – Magduso usab og counter charges si Department of Transportation kon DOTr-Caraga OIC regional director Joel Consulta batuk sa mga tawong anaa sa Land Transportation Office kon LTO-Caraga nga maoy iyang gidudahang nagpa-entrap kaniya sulod mismo sa iyang buhatan niadtong Miyerkules sa udto.
Kini ang bahad sa opisyal sa eksklusibong pakighinabi sa Bombo Radyo Butuan, dungan sa pagbutyag nga maka-low morale ang pag-entrap kaniya sa mga sakop sa Criminal Investigation and Detection Group kon CIDG-Caraga tungod sa alegasyong pagpangilkil.
Gipadayag ni Consulta nga duna siya’y mga ka-ubanan sa trabaho nga naghanyag kaniya og usa ka milyon ka pesos matag-buwan aron lang ipabilin sila sa ilang trabaho kansa wala matud pa niya dawata sa rasong mas gusto niyang masunod ang balaud alang sa kaayuhan sa ilang mga kliyente.
Duna na matud pa siya’y lead sa mga mihimo niini ngadto kaniya ug iya kining dalhon sa saktong forum dungan sa pagseguro nga iya usab nga atubangon ang mga kasong ipasaka batuk kaniya bisan asa man sila mu-abot.
Hugot niining gibarugan nga wala siya mahadlok kung kinsa man ang utok sa pagpa-entrap kaniya tungod kay wala matud pa siya magbinuang sa iyang trabaho.
Gawas pa, wala’y nakuhang ebidensya ang operating team nga magduot kaniya sa maong alegasyon dungan sa pagpasabot wala usab siya’y kasayuran sa gika-ingong boodle money nga maoy gigamit pag-entrap kaniya.
Gipaniguro pa niini nga iyang kuhaon ang tawong nagpaluyo sa maong operasyon.
