BUTUAN CITY – Padayon pang gisuta sa mga otoridad ang kinatibuk-ang damyos human gilamoy sa kalayo ang usa ka kotse kagahapon sa may Arujville Subdivision, Capitol Bonbon Road, sakop sa Brgy. Libertad ning siyudad sa Butuan
Ang nasunog nga sakyanan mao ang usa ka Suzuki Ertiga, nga gimanehuan sa tag-iya niining si Edwin Casintahan Dacera, 62 -anyos, minyo ug residente sa Block 10, Lot 35, Phase 3, Emenville Subdivision ning siyudad.
Human nakadawat og tawag ang kapulisan sa sentrong bahin ning siyudad, dali nila kining girespondihan uban sa ilang duty investigator, kondiin sa ilang pag-abot, anaa na ang taga-Bureau of Fire Protection.
Sigon ni BFP investigator F03 Ben Sergio Pelletero, nagsugod ang kalayo sa makina sa sakyanan hinungdan sa pag-spark niini ug pag-malfunction sa clutch hinuon wala’y natalang angol.
