BUTUAN CITY- Pabiling ilalom gihapon sa General Community Quarantine with Heightened restrictions ang dakbayan sa Butuan sugod karong Setyembre 8 hangtud Setyembre 30, kini base sa gi-anunsyo sa National IATF.
Apan tungod sa nagkataas nga kumpirmadong kaso sa dakbayan sa Butuan, nagpagawas og Executive Order No. 41 si Butuan City Mayor Ronnie Vicente Lagnada ingun man ang Regional Task Force for Covid-19 One Caraga Shield nga ipailawom sa Modified Enhanced Community Quarantine o MECQ ang 76 ka mga barangay sa syudad sugod karung adlawa hangtod sa Setyembre 22.
Kini isip tubag sa nagkataas nga kaso sa syudad nga maoy hinungdan sa pagkapuno sa mga ospital ug quarantine facilities sa syudad.
Sa mga miaging adlaw hangtud kagahapon tag-as ang mga kaso nga natala sa syudad ug nga niabot na sa kapin 100 ang kumpirmadong kaso sa Covid-19. Lakip na niini ang 76 ka barangay nga adunay mga aktibong kumpirmadong kaso sa Covid-19.
Tungod niini mihangyo ang lokal nga panggamhanan ning syudad ngadto sa publiko nga aron maprotektahan ang kaugalingon ug pamilya ingun man ang ubang tao kanunay nga sundon ang minimum health protocols sama sa pagsuot og facemask ug faceshield, pag obserba sa physical distancing ug kung mahimo magpuyo sa panmalay kung walay importanteng lakaw aron sa ingun nga mapugngan ang pagkaylap pa sa virus.
