BUTUAN CITY– Milansang na sa kapin libu ang natalang mga namatay sa COVID-19 sa Caraga Region.
Sa datos nga gipagawas sa Department of Health-Caraga kagahapong adlawa, pito ang nadugang sa listahan sa mga namatay nga nagpasaka sa kinatibuk-ang 1,005 nga mga casualty.
Nagtaho usab ang buhatan og 532 ka mga bag-ong kaso sulod sa usa ka adlaw ug 194 nga mga nimaayo.
Sa mga bag-ong kaso , pinakadaghan gihapon ang gikan sa Agusan del Sur nga miabot sa 208, gisundan kini sa syudad sa Butuan nga adunay 126 samtang mitala usab og 67 ka mga kaso ang Surigao del Sur; 34 ang gikan sa Bayugan City; 32 ang natala sa Surigao del Norte; samtang dunay 26 ka kaso sa Agusan del norte; ingun man tag 13 ka kaso sa Bislig City ug Tandag City; 4 sa Surigao City ug 1 sa Cabadbaran City.
Sa pakakaron ang Caraga aduna pay 3,982 ka kaso nga aktibo. Ubay-ubay na usab nga mga ospital sa rehiyon ang anaa sa critical level kansa ang uban nagdeklara pa nga napuno na sa mga pasyente tunga-tunga sa padayong pagkaylap sa COVID-19 infections.
