BUTUAN CITY – Patong-patong nga mga kaso ang gi-andam sa ginsakpan sa Philippine Drug Enforcement Agency kon PDEA-Caraga uban sa kapulisan sa Prosperidad, Agusan del Sur ug PDEA provincial office batuk sa lima ka mga drug personalities nga nadakpan human ang malampusong buy-bust operation pasado alas-6:20 kagabii sa Purok 5, Brgy. Poblacion sakop sa maong lungsod.
Naila ang subject sa operasyon nga si Bryan Paldapan kinsa duna matud pa’y gimintinang drug den.
Sa eksklusibong pakighinabi sa Bombo Radyo Butuan, gipadayag ni PDEA-Caraga spokesperson Dindo Abellanosa, modus na matud pa ni Paldapan nga kung maka-deal na og ginadiling druga, agnihon niya ang iyang suki nga adto maglatay sa gi-abangan niyang kwarto nga gihimo niyang drug den, rason nga nasapon ang laing upat nga nag-pot session.
Naila kining sila Wesley Owen Morales, 34 anyos, residente sa Purok 22, Brgy Poblacion ug administrative assistant 2 sa ilang munisipyo; Dennis Doctora, 39 anyos, menyu, usa traffic enforcer uban sa aswa niining si Dimple Doctora, 44-anyos, pulos residente sa Purok 15, Brgy. Poblacion ug Louie Villaruz, 34 anyos, usa ka mekaniko, residente sa Purok 1, Brgy La Union pulos sakop sa maong lungsod.
Nakumpiska sa ilang posisyon ang usa ka selyadong plastic sachet sa gidudahang shabu ingon man laing pito ka plastic sachets sa gidudahang shabu nga mutimbang usab og 10g; usa ka cellular phone; mga shabu paraphernalia ug 3 ka aluminum foil strips nga dunay traces sa shabu; usa ka tinood nga 1,000 peso bill; ingun man buy-bust money ug nagkadaiyang denomination sa bills nga nagkantidad og 2,100.
