BUTUAN CITY – Bisan og nakarekober si Carlo Paalam gikan sa first-round knockdown, apan nakuwangan ang paningkamot sa Pinoy boxer nga mabali ang momentum batuk kang British boxer Galal Yafai hinungdan nga silver medal ang nakuha niini sa men’s flyweight boxing competition kaganina sa nagpadayong 2020 Tokyo Olympics.
Natumba samtang nakasandig sa luna si Paalam sa opening round dihang nagbinayluay sila og kinomo ni Yafai, human na-igo ang ulo niini sa nagpungasing mga kinomo sa British boxer resulta nga naka-score kini og knockdown.
Apan mipadayon sa pagpakita sa iyang ka-isog ug kalig-on ang garbo sa Cagayan de Oro City sa misunod nga duha ka mga rounds, kondiin balos-balos sila og labay og kinomo ni Yafai kinsa padayon usab nga mibarog og wala matumba.
Sa katapusan, dili pa igo ang paningkamot ni Paalam aron makumbinsi ang mayoriya sa mga judges rason nga upat kanila ang mipabor kang Yafai sa score nga 29-28 ug usa ang mipabor sa Pinoy boxer.
Tungod niini, ang Team Philippines duna na’y usa ka gold, duha ka silvers ug usa ka bronze medals kansa mao gihapon ang makonsiderang best Olympic appearance sa kasaysayan sa nasud.
