BUTUAN CITY- Giklaro sa Department of Health DOH-Caraga nga wala pay nakumpirma sa rehiyon nga adunay nagbaton og Delta Variant sa COVID-19.
Sa pakighinabi sa Bombo Radyo Butuan ,gibutyag ni Dr. Gerna Manatad, OIC-Asst. Regional Director sa DOH Caraga , nga hugot nilang ginamonitor ang mga nangtumaw karon nga klase o variant sa COVID-19 ug base sa ilang Bio Intensive Surveillance wala pay nakumpirma nga adunay nagbaton niini dinhi sa rehiyon.
Una nang gitin-aw NI Department of Health (DOH) Sec. Francisco Duque III nga walay natalang local cases sa Delta variant sa COVID-19 sa Pilipinas. Kini base sa whole genome sequencing Philippine Genome Center (PGC).
Ang PGC matod pa ang maoy mag-ingon kung adunay nakasulod nang Delta virus sa nasud pinaagi sa ilang gipakusgan nga biosurveillance.
Gihatagan usab og gibug-aton ni Dr. Manatad ang pagbaton karon og bakuna batok sa COVID-19 ang usa sa mga nag-unang depensa aron dili basta-basta matakbuyan sa virus gawas sa pagtuman sa mga public health standard.
Human usab ang paghidangat sa mga bakuna sa nasud ning nakalabay nga adlaw,naglaum ang opisyal nga mas daghang bakuna ang magahin sa nasudnong kagamahanan dinhi sa rehiyon aron dretso na ang pagmakauna sa mga priority groups.
