BUTUAN CITY – Gibana-banang mukabat sa 6-milyunes pesos nga balor sa gipalusot nga mga hardwood nga Magkono ang malampusong na-intercept sa Coast Guard Station Surigao del Norte uban sa mga sakop sa Philippine Ports Authority, Philippine National Police ug Department of Environment and Natural Resouces kon DENR gikan sa tulo ka mga ten-wheeler wing van trucks.
Na-intercept kini sa pantalan sa Brgy. Lipata, Surigao City, Surigao del Norte ning mi-aging alas-8:57 sa gabii kansa isakay na unta sa MV Maria Felisa padulong sa San Ricardo, Southern Leyte human gisumbong sa Port Police sa Lipata ngadto sa Coast Guard rason sa gihimong ocular inspection.
Dinhi na nasuta nga wala’y mapakitang dokumento ang driver sa wingvan nga si Renz Cabayao, residente sa Brgy. Alibunan, Calinog, Iloilo City ug ang iyang helper nga si Rogelio Doble, 55-anyos ug residente sa Brgy. San Antonio Agdao, Davao City, human niini gibutyag nga mga sinakong bugas lang ang iyang karga apan sa kamulo og inspeksyon, dinhi na nasuta nga gitabunan diay sa mga sinakong bugas ang mga hardwood lumbers nga Magkono.
Dinhi na gisikop ang driver tungod sa illegal transport sa mga forest products nga kalapasan sa PD 705 kon mas nailang Forestry Reform Code of the Philippines ug dinhi na usab mitug-an ang driver nga duna pa’y laing duha ka mga wingvan trucks nga ka-uban niya og biyahe.
Padayon pang gipangita ang mga drivers sa laing duha ka wing van nga sila Alex Flojo, 55-anyos, residente sa Tigaon, Camarines Sur ug Dionito Aldas, driver ug tag-iya, 44-anyos ug residente sa P-Sambag Visayan Village, Tagum City, Davao del Norte.
