BUTUAN CITY– Mi-abot na sa kapin 91,000 ka mga indibidwal ang nabakunahan sa COVID-19 sa intero rehiyon sa Caraga.
Sa latest data nga gipawas sa Department of Health-Center for Health Development- Caraga sa May 25, mi-abot na sa 91,180 ang kinatibuk-ang ihap sa mga indibidwal nga malampusong natupukan sa COVID-19 vaccine gamit ang mga klase sa mga bakuna nga available karon sa rehiyon.
Lakip sa mga natupukan na ang mga myembro sa priority groups, mga healthcare workers , senior citizens ug kadtong adunay mga comorbidities gamit ang Sinovac ug AstraZeneca vaccines.
Nagpadayon pa usab ang vaccination rollout sa lahi pang mga priority groups sama sa mga senior citizens, nabilin pang health care workers ug mga adunay comorbidities apan limitado lang ang ihap tungod usab sa limitadong supply sa bakuna.
Samtang, dinhi sa syudad sa Butuan miabot na sa 10,441 ka tao ang nabakunahan batok COVID-19 sukad gisugdan ang vaccination rollout adtong Marso.
