BUTUAN CITY – Mag-atubang og mga kasong kriminal ug administratibo ang sakop sa Highway Patrol Group kon HPG-Agusan del Norte nga aktong nasapong nangilkil sa tag-iya sa usa ka sakyanang ilang nadakpan human ang entrapment operation kaganinang alas-7:45 sa buntag didto sa karaang police station sa Cabadbaran City.
Sa eksklusibong pakighinabi sa Bombo Radyo Butuan, gipadayag ni PLCol. Renel Serrano, station commander sa Cabadbaran City Police Station nga duha ka semana nang gi-surveillance ang suspek nga si PSSgt Ronelo Tering-Tering, residente sa Purok 4, Brgy. San Francisco, Panabo City human nag-demand og 20-mil pesos nga kwarta gikan sa tag-iya sa usa ka mini-dump truck nga ilang nadakpan ug gi-impound sa ilang office compound.
Mi-ubos matud pa kini ngadto sa 5-mil pesos hinungdan nga nagkasabot sa adlaw nga inutol ang kwarta ug wala matud pa makamalay ang suspek nga ang iyang ka-transaksyon, mga personahe na diay sa Integrity Monitoring Enforcement Group kon IMEG-Mindanao field office rason nga wala na siya makalikay pa.
Dugang pa ni Serrano, mag-atubang og kasong robbery extortion ang suspek alang sa criminal aspect samtang grave misconduct usab sa kasong administratibo nga ipasaka mismo sa iyang mother unit, ang HPG-provincial office.
Nasuta pa sa pakisusi sa taga-IMEG nga higayong duna’y madakpang sakyanan ang suspek, iya kining inegosyar og cash rason nga usa sa iyang mga nadakpan ang nagpatabang na sa IMEG.
Nakuha gikan sa iyang posisyon ang 2-mil pesos nga marked money ug 9mm issued firearms.
