BUTUAN CITY – Gihaya na sa usa ka punerarya sa Brgy. Malicato, lungsod sa Las Nieves, Agusan del Norte ang magti-ayong nakabsan sa kinabuhi human mitiklaob ang ilang gisakyang barutong wala’y katig niadtong Sabado dihang ania pa sa bisinidad sa Caraga Region ang bagyong Bising.
Naila ang namatay nga sila Rachel Ann Mordeno, 30-anyos ug Clayme Concon, 32-anyos samtang luwas pang nahatud ni Concon daplin sa suba ang ilang 4-anyos nga anak.
Sa eksklusibong pakighinabi sa Bombo Radyo Butuan, gibutyag ni Police Staff Sgt. Jefferson Macabenta sa Las Nieves Municipal Police Station, gikan sa Brgy. Isidro ang mga biktima ug padulong unta sa Brgy. Ambacon sakay sa baruto dihang gihapak kini sa kusog nga bul-og tubig sa suba, hinungdan nga na-out balance hangtud nga mitikla-ob.
Base sa ilang imbestigasyon, human nahatud sa amahan sa daplin sa suba ang anak, gibalikan niini ang iyang asawa apan apil na siya sa na-missing ug kaganinang alas-nueve pa sa buntag napalgan ang iyang patay’ng lawas.
