BUTUAN CITY – Dead on the spot ang usa ka ulitawo human nadasmagan sa tulo ka mga sakyanan kondiin duha ang mi-hit-and-run kaniya pasado alas-8 kagabie sa may Purok-8, Brgay.Baan Km.3 ning siyudad.
Naila ang napatay nga biktima nga si John Rey Bartolo 23-anyos, kasamtangan nagpuyo sa nasangpit nga lugar apan lumad nga taga-Lapaz, Agusan del Sur, helper ug magtutungha sa usa ka welding school sa may Brgy. Tiniwisan ning syudad.
Sa eksklusibong pakighinabi sa Bombo Radyo Butuan, gipadayag ni Franklin Balderan kaubanan sa trabaho sa biktima, maghatud lang unta og panihapun si Jonh Rey sa mga boarders nga iyang gisak-an apan sa pagpa-uli niini dinhi na natigayon ang insidente diin una kining nabanggaan sa Isuzu MUX nga kolor puti ug nasegundahan pa sa gasunod nga Toyota Hi Lux nga kolor itom kansa wala muhunong ug misibat padulong sa sidlakang direksyon padulong sa Ampayon area.
Sunod nga mibangga sa biktima ang nagsunod nga motorsiklo nga miresulta usab sa pagkalagpot sa driver ug angkas niini kondiin gidala sa ospital ang nagrabehang driver.
Tungod niini, naka-angkon ang biktima og head injury ug nabali pa ang tuong tiil resulta sa hinanali niining kamatayon.
Sumala usab ni Bryan Nulo, magtutudlo sa biktima sa gitunghaan niining welding school, mahuman na unta kini sa pagtungha karong Abril 22 gikan sa 34 ka adlaw nga kursong gikuha apan nalambigit kini sa ngilgig nga aksidente.
Gipadayag usab niini nga mu-abag ang ilang tunghaan alang sa pagpahimutang sa patay’ng lawas sa maong magtutungha nga gipahiluna na sa usa ka punerarya.
Nanawagan usab karon ang kapulisan sa nagmaneho sa duha ka mga sakyanang nanibat nga musurender sa pinakadool nga police station.
