BUTUAN CITY – Nakatala og 17 ka mga bag-ong COVID-19 cases ang Caraga Region samtang wala’y patay rason nga nagpabilin pa gihapon sa 313 ang total deaths nga hatud sa coronavirus ning rehiyon.
Ang 17 ka mga bag-ong kaso nga pulos naka-isolate, maoy hinungdan nga mi-abot na sa 7,988 ang cumulative cases ning rehiyon, 339 pa ang padayong naka-isolate ug 7,336 ang mga nakarekober.
Sa pinaka-ulahing situational bulletin sa Department of Health kon DOH-Caraga, sa mga bag-ong kaso, 16 niini pulos taga-Butuan samtang usa ang taga-Buenavista, Agusan del Norte.
Dinhi sa Butuan, 4 ka mga kaso ang natala sa Brgy. Baan Km.4 samtang tag-duha sa Brgy. Bayanihan, De Oro, J P Rizal ug Villa Kananga samtang tag-usa na sa Brgy. Agao, Ambago, Lapu-Lapu ug Pagatpatan.
Samtang subay na sa padayong vaccination roll out sa mga healthcare frontliners sa tibuok rehiyon, mi-abot na sa 5,838 ang natupukan niini.
