BUTUAN CITY – Gibana-banang mi-abot sa 1.5-milyunes pesos ang damyos sa natigayong sunog kagahapon sa Brgy. Bongtud, Tandag City, Surigao del Sur nga mikalas sa duha ka mga bata human nga mi-abot sa 10 ka mga balay ug usa ka garahe ang na-abo sa kalayo.
Sa eksklusbong pakighinabi sa Bombo Radyo Butuan, gipadayag ni SFO1 Fire Dennis Trias nga nagsugod pag-ulbo ang kalayo sa pinuy-anan ni Agustin Ramirez diin namatay ng mga bata nga wala nabantayan sa mga ginikanan tungod kay nanagat man ang ilang amahan samtang didto usab sa tindahan ang ilang inahan rason nga nabilin lang ang 4 ka managsoon.
Tungod sa kahinanok, bugtong ang 12-anyos l.ang nilang anak ang nakamata kinsa mikuha gilayon sa iyang pinakamanghod nga igsoong makugos pa.
Wala na mabaliki pa sa bata ang iyang mga igsoong nag-edad og 7 ug 4-anyos tungod sa kapaspas pagkalap sa kalayo kondiin nalatayan pa ang iyang kamot sa kalayo hinungdan nga maayo nang pagkapa-ig ang duha dihang nakit-an na human napalong ang kalayo pasado alas-8:30 na sa buntag.
